Berdintasunaren eta emakumeen aurkako indarkeriarik gabeko bizitzen aldeko herrialdeko Itunaren aurkezpena

Lehendakariak bereziki eskertu du ekimenean parte hartu duten ehun euskal erakundeen inplikazioa, eta nabarmendu du Euskadik etorkizunari begiratzen diola etorriko diren belaunaldientzat mundu hobe bat irudikatzeko aukera ematen duen itun baten bidez.

Ituna sortzeko prozesuan 38 lantalde izan dira, Beatriz Artolazabal Berdintasun, Justizia eta Gizarte Politiketako sailburuak azaldu duen bezala. Lantalde horietan, tokiko erakundeetako, enpresetako, ikastetxeetako eta unibertsitateko, kirol-erakundeetako, hirugarren sektoreko elkarteetako, alderdi politikoetako eta sindikatuetako 450 pertsonak baino gehiagok hartu dute parte, besteak beste.

Itunaren hamar konpromisoak ekitaldian irakurri dituzte prozesuan parte hartu duten zenbait erakundek, hala nola UGT sindikatuak, Sartu Álava laneratzeko elkarteak, Lauaxeta ikastolak, Emakunderen aholku-batzordeko emakumeen elkarteen ordezkariek, Gizardatz Bizkaiko ekimen eta esku-hartze sozialeko erakundeen elkarteak, EDE Fundazioak, Gasteizko Udalak, Unesco Etxeak, Famek euskal emakumeen elkarteak eta Euskal Herriko Unibertsitateak.